Zampui Phuldungsei ah ration card 85 Mizoram Sorkarin a paih sak; ration card pe let turin bialtu MLA in Chief Minister ah thlen

by News Editor

Tualchhung News

ZORAM TODAY| 22nd July, 2024 (Mon): Mizoram Sorkar chuan Hachhek bial, Phuldungsei ah ration card 85 tunhnaiah a cancel nia thudawn a ni a, hei hi Mizo hnam pawi sawina ang ah ngaiin Hachhek bialtu MLA Robert Romawia Royte chuan ration card pe let leh vek turin vawiin khan Chief Minister Lalduhoma a ngen.

Robert Romawia Royte chuan, “Hachhek bial chhunga Zampui Phuldungsei khua khu geological survey a a lan dan leh Mizo history atanga en pawhin Mizoram chhunga mi a ni a. MNF sorkar chuan Village Council te pawh a lo pe tawh a. Tin, hun hmasa lama Congress Sorkar lai atang daih tawh pawhin Mizoram voters list leh ration cards ah an awm tawh a ni,” a ti.

“Tripura Sorkar hian policy fel tak neiin Phuldungsei khuaa mite hi ration card leh voters list ah an tel a, a mipuite’n Mizoram zawka awm an duh thu an hrilh pawhin an khaw hmuna verify tu officer te ngei pawhin 'Tripura chuan kan delete thei lo che u, ration pawh la kawp mai rawh u' tiin Tripura atanga Phuldungsei mite delete an duh loh thu hmaichhanah pawh an hrilh, niin Chief Minister hnenah ziakin a thlen a ni.

“Hetiang a nih laia ZPM Sorkarin inrawnna pawh awm miah lova Zampui Phuldungsei khuaa Mizoram ration card neitu mi 85 lai mai ration card atanga a paih ta mai hi hriatthiam theih a ni lova, Mizo hnam pawi sawina a ni," Hachhek bialtu MLA chuan a ti.

Chief Minister hnenah hian, “Khawngaih takin a rang thei ang bera heng mite hi an ration card pe let leh turin ka ngen che a ni. Ramri chungchang hi hnam Issue pawimawh a nih avangin i ngaih pawimawh ngei ka duha, he issue-ah hian bialtu MLA ka nih angin Sorkar tan tangkai theihna ka neih chuan theihtawp chhuahin nangmah leh i Sorkar pawh puih ka inhuam tih ka hriattir bawk a che," tiin ngenna a siam.